सबै प्रदेशमा ९० दिनलाई पुग्ने गरि भण्डारण गृह निरमार्ण गर्दै आयल निगम, सुरुवात पाेखरा बाट

नेपाल आयत निगमले पोखरामा देशकै दोस्रो ठूलो पेट्रोलियम भण्डारण गृह निमार्ण गर्ने भएको छ । भण्डारण क्षमता न्यून भएकोले प्रकृतिक प्रकोप, नाकाबन्दी जस्तो मसयमा समस्या हुने गरेको भन्दै तीन कहिना अर्थात ९० दिनलाई पुग्ने भण्डारहण गृहहरु निमार्ण गर्न लागेको छ । निगमले २०५८ सालपछि निगमकै आफ्नै लगानीमा पहिलो कामको रुपमा यो परियोजना अघि सारेको हो ।
हरेक प्रदेशमा कम्तीमा ३ महिनाका लागि इन्धन भण्डारण क्षमताको डीपो निर्माण गर्ने निगमको घोषणा नीतिअनुरुप पहिलो परियोजनारुपमा गण्डकी प्रादेशिक डीपोको क्षमता अभिवृद्धि सुरु गरिएको निगमका कार्यकारी निर्देशक सुरेन्द्र पौडेलले जानकारी दिए ।
पोखरा महानगरपालिका वडा २९ र ३० अन्तर्गत गगनगौंडामा रहेको सो डीपोको भण्डारण क्षमता बिस्तारले प्रदेशमा पेट्रोलियम पदार्थको बिक्री वितरणलाई सुदृढ बनाउन कोसेढुंगा सावित हुने विश्वास गरिएको छ ।
हाल डीपो रहेको कुल २७ रोपनी जग्गालाई नै व्यवस्थापन गरेर निगमले पहिलो चरणमा ५० लाख लिटर क्षमताका दुई छुट्टाछुट्टै डीजल भण्डारण ट्याङ्क निर्माण गर्नेछ । सो परियोजना आगामी २ वर्षभित्र सम्पन्न गर्ने लक्ष्य छ । परियोजनाको ठेक्का समानान्तर–रेलिगेयर–भारत ट्यांकस जेभीले पाएको छ । यो डीपो अमलेखगञ्जपछिको नेपालकै दोस्रो ठूलो पेट्रोलियम भण्डारण गृह बन्नेछ ।
परियोजनाको एक समारोहबीच उद्योग, वाणिज्य तथा आपूर्तिमन्त्री लेखराज भट्टले शिलान्यास गरेका हुन् । उनले कोरोना महामारीले कमजोर बनाएको अवस्थामा अर्थतन्त्र सुदृढ बनाउन सरकार कटिबद्ध रहेको बताए । उनले आगामी दिनमा पेट्रोलियम पदार्थ आपूर्तिमा कुनै कमजोरी हुन नदिने बताए ।
नाकाबन्दी, विनासकारी भूकम्प लगायत विषम परिस्थितिको बेला नेपाली जनताले भोग्नुपरेको समस्या मध्यनजर राख्दै सरकारले यो अभियान अघि सारेको मन्त्री भट्टले प्रष्ट पारे ।

उनले भने, ‘यो विकासको एउटा फड्को हो । छोटो समयमै जनताले विकास चाहेका छन्, परिणाम देखिने सरकार काम गर्न चाहन्छ । त्यसको ज्वलन्त उदाहरण यो हो ।

’

उनले आर्थिक समृद्धिको दिशातर्फ अघि बढ्न सबैको साथ र सहयोग आवश्यक रहेको बताउँदै कोभिडसँग लड्ने र देशको अर्थतन्त्र कमजोर हुन नदिने गरी सरकार अघि बढेको दाबी गरे ।

नयाँ पहुँच सडक, २ लाख लि। क्षमताको पानी भण्डारण ट्यांक, डीपोको चमेना गृह, चालक तथा सुरक्षाकर्मी बस्न नयाँ संरचना निर्माण गरिनेछ । इन्धन भण्डारण ट्यांक र सोमा जडान हुने संरचना जर्मन प्रविधिमा आधारित पूर्ण स्वचालित हुनेछन् । डीजल लोड तथा अनलोड सुविधा पूर्णरुपमा स्वचालित र हाइटेक सुरक्षा प्रविधिमा आधारित हुने निगमका कार्यकारी निर्देशक पौडेलले बताए ।

यस्तै, नयाँ भण्डारण गृहमा २० हजार लिटर क्षमताका ३२ देखि ४० ट्यांकरले दैनिक डीजल अनलोड गर्न सक्नेछन् । ट्यांकर अनलोडका लागि प्रतिघण्टा १२० किलोलिटर क्षमताका ५ वटा पम्प जडान गरिने जनाइएको छ । कुनै कारण डीपोमा आगलागी भए करिब २ घण्टासम्म निरन्तर आगो नियन्त्रणका लागि लड्ने क्षमताको पूर्वाधार डीपो हुनेछ । ७० प्रतिशत पानी र ३० प्रतिशत फोमयुक्त अग्नि नियन्त्रण उपकरण प्रयोग हुनेछ ।